الإقامة الإنسانية سريعا , وديه المعلومات اللي اعرفها ولو حد عنده اضافة او تعديل يبلغنا مشكورا
- أولا هي معمولة للي ميقدروش يرجعوا بلادهم بسبب الظروف السياسية , زي حالاتنا
- بتروح أمنيات فاتح وتقدم فيها في قسم خاص هناك , مجرد متروح وتقول "إنساني إقاميت" هيفهمك
- هيجيبولك حد بيتكلم عربي , تقوله انا مقدرش ارجع بلادي لاسباب كذا كذا كذا
- هيدرسوا حالتك والموضوع هياخد فترة طويلة , ممكن 5 او 6 شهور لغاية لما ييجي الرد
- فيه احتمال برفض الإقامة لو مقتنعوش بحالتك
- لو اخدتها تبقي انت مقيم في تركيا رسمي , وتقدر تسافر اي مكان خارج تركيا وترجع تاني ما عدا مصر
- لو سافرت لمصر حتي لو عن طريق دولة تانية احتمال يحصلك مشكلة في مصر او في تركيا , في مصر عشان هيعرفوا انك مغضوب عليك من النظام المصري فاحتمال يجيبوك تتعشي معاهم في امن الدولة ويكرموك آخر كرم
- ولو عرفت ترجع تركيا , و الظابط مسك جواز سفرك ولقي ان فيه ختم دخول لمصر بتاريخ بعد تاريخ اقامتك الانسانية , احتمال يسحبوها منك لاقتناعهم انك لا تستحقها بدليل انك نزلت مصر
- ميزتها انها من غير مصاريف
- ميزتها كمان انك ممكن تعملها لو كاسر فيزا , لما يستحيل عندك انك تعمل السياحي
- ميزتها كمان انك ممكن تعملها لو كاسر فيزا , لما يستحيل عندك انك تعمل السياحي
- من عيوبها ان زي ما قلتلك لو رجعت مصر ممكن تتأذي هناك او تتسحب منك هنا
- كمان من عيوبها , ان الانتخابات اللي هتتم بكرة , لو لأي سبب جه حزب الشعب الجمهوري اللي هو مؤيد تماما للسيسي وكاره لمرسي , لو فاز الحزب ده بنسبة اكبر , احتمال كبير يحصل تقارب تركي مصري , ساعتها كل اللي واخدين انسانية هياخدو شلوت محترم , و هيبقي الحكومة التركية كريمة جدا لو قالتلنا , قدامكم اسبوع وتسيبو تركيا , ده طبعا هيبقي كرم منها , عشان ممكن يستغبوا ويسلمونا مصر زي ما حصل للاذربيجان من سنين طويلة لما سلموهم للاتحاد السوفيتي وعدموهم فورا
==========================
فرايي الشخصي , محدش يقدم علي الانسانية لخطورتها وعدم استقرارها علي الاطلاق , السياحي اضمن كتير , ولو انت كاسر فيزا قدم علي الانسانية , ولما تاخدها قدم علي السياحي فورا , ولو خدت السياحي هتبقي في امان , تقدر تنزل مصر وترجع تاني كما تشاء , و لو حزب الشعب الجمهوري حتي اخد 100 % محدش يقدر يقولك تلت التلاتة كام
وربنا يوفقكم جميعا
ليست هناك تعليقات:
إرسال تعليق